praza.gal, 27 decembro 2024.
Nas semanas anteriores á celebración da XVIII Asemblea Nacional do BNG todas as aparencias indicaban que estabamos diante dunha cita desprovista de tensións internas. A favor desta interpretación operaba a circunstancia de que non había constancia da existencia de diferenzas relevantes nos relatorios político e organizativo que estaban sendo obxecto de tratamento no seo da organización.
Esa presunción de tranquilidade foi parcialmente desmentida pola concorrencia de dous feitos inicialmente non previstos: a presenza -por primeira vez dende o ano 2016- de tres candidaturas aos órganos de dirección e a publicación -seis días antes do comezo da Asemblea- dun comunicado da UPG fixando a súa posición ante o que se ía debater nese evento.
